Grianghraif

Mícheál Turraoin (le caoinchead Chnuasach Bhéaloideas Éireann, An Coláiste Ollscoile, BÁC)

Nóta beathaisnéise

Turraoin (Traoin, Terry), Mícheál (Míhál, Maidhc Dháith) (1878-1963): Sa Pháirc ar Chnocán an Phaoraigh Íochtarach, paróiste na Rinne, contae Phort Láirge a rugadh é ar an 20 Márta 1878. Ba é Dáibhidh Turraoin, iascaire, a athair, agus ba í Siobhán Ní Mhuirighthe a mháthair. Díshealbhaíodh an teaghlach agus chónaigh siad i dteach Shiobhán Ní Churraoin, comharsa leo, ar feadh roinnt blianta sula bhfuair siad teach i mBaile na nGall Beag. Níor fhoghlaim Mícheál Turraoin léamh ná scríobh riamh. Ba oibrí é a chaith tamaill ag iascaireacht, ag aoireacht, ag déanamh obair feirme, ag obair ar bhóithre agus ag obair mar sheirbhíseach, i measc rudaí eile. Bhí sé i mBaile Uí Churraoin, fostaithe mar oibrí feirme le linn dhaonáireamh 1901 [http://www.census.nationalarchives.ie/reels/nai001246551/]. Phós sé Bríd Ní Bheaglaoich i 1902 agus chuaigh chun cónaithe ina teach siúd. I mBaile Mhac Airt Íochtarach a bhí siad lonnaithe le linn dhaonáireamh 1911 [http://www.census.nationalarchives.ie/reels/nai003477745/]. Bhí cúig pháiste dhéag acu. Fostaíodh Mícheál mar sheanchaí agus fear oibre i gColáiste na Rinne. Fuair sé bás ar an 13 Deireadh Fómhair 1963, in St. Joseph's Home i nDún Garbhán. Don ábhar seanchais a bailíodh uaidh féach, mar shampla, Mícheál Ó Cionnfhaolaidh, Beatha Mhichíl Turraoin, maille le sceulta agus seanachas (BÁC, 1956), agus Máirtín Verling (eag.), Leabhar Mhaidhc Dháith: scéalta agus seanchas ón Rinn (An Daingean, 2007). Tá ábhar a bailíodh uaidh ar fáil i gCnuasach Bhéaloideas Éireann (COBÁC) chomh maith. Tá cuid mhaith eolais faoi Mhícheál Turraoin cruinnithe ar an suíomh Ainm.ie ag http://www.ainm.ie/Bio.aspx?ID=0683. Tá breis eolais faoi sa dírbheathaisnéis a scríobh Mícheál Ó Cionnfhaolaidh síos uaidh (Ó Cionnfhaolaidh, op. cit.), agus in Máirtín Verling, op. cit.

Foirm Eolais Phearsanta ('Personalbogen')